Avtomobil bazarında BAHALAŞMA RİSKİ?

İqtisadçı ekspert Natiq Cəfərli ajans.az-a açıqlamasında bildirib ki, bu azalmanın əsas səbəbi ötən ilin sonunda hibrid və elektrik avtomobilləri ilə bağlı güzəştlərin ləğv olunacağının əvvəlcədən məlum olmasıdır. 

Ekspertin sözlərinə görə, məhz bu səbəbdən ötən ilin oktyabr, noyabr və dekabr aylarında sahibkarlar mövcud güzəştlərdən yararlanmaq üçün böyük həcmdə avtomobil idxal ediblər: 

“İdxal ötən ilin sonunda o qədər artdı ki, indi həmin avtomobillər hələ də satılır. Artıq ilin yarısına çatmışıq, amma iş adamları ötən il gətirdikləri avtomobilləri realizə etməyə çalışırlar. Çünki çox böyük həcmdə gətirmişdilər. Ötən ilin son 3 ayında əvvəlki dövrlə müqayisədə idxalda təxminən iki dəfəyə yaxın artım müşahidə olunub. Hazırkı azalma isə əsasən həmin artımın nəticəsidir. 

Ekspert avtomobil qiymətlərinin dəyişməsinin isə bir neçə amildən asılı olduğunu vurğulayıb: 

“Hazırda ötən illə müqayisədə müəyyən qiymət artımı da var və əsas təsir edən amillərdən biri avtomobil kreditlərinin əlçatan olub-olmamasıdır. Əgər banklar avtomobil kreditlərini asanlaşdırsalar, bu zaman avtomobil satışlarında da ciddi artım müşahidə oluna bilər”. 

Natiq Cəfərli avtomobil almaq istəyən şəxslərə isə şəxsi maliyyə imkanlarını nəzərə almağı tövsiyə edib: 

“İnsanlar avtomobil alanda öz ciblərinə, istəklərinə və ehtiyaclarına uyğun qərar versələr, həmişə daha doğru seçim etmiş olarlar”. 

Mələksəda Ziyad