Məşhur blogger 500 milyon abunəçi həddini keçdi

Ajans.az xəbər verir ki, 28 yaşlı bloger və sahibkar video platformasında yarım milyard izləyici toplayan ilk şəxs kimi rəqəmsal əyləncə sənayesindəki lider mövqeyini daha da möhkəmləndirib.

Məlumatlara görə, MrBeast-in auditoriyasının təxminən 40 faizini 13–17 yaşlı yeniyetmələr, 20 faizini isə 18–24 yaş arası gənclər təşkil edir.

Bu tarixi nailiyyəti qeyd etmək üçün Donaldson canlı yayım açaraq abunəçi sayının 500 milyonu keçdiyi anı izləyiciləri ilə bölüşüb. Lakin o, böyük şou və xüsusi effektlər əvəzinə sadə format seçərək ilk videolarına baxıb və YouTube karyerasının başlanğıcını xatırlayıb.

Bu rekord, Donaldsonun son günlərdə verdiyi maraqlı açıqlamalardan sonra əldə olunub. O, “The Wall Street Journal”a müsahibəsində milyardlarla dollar dəyərində aktivlərə sahib olmasına baxmayaraq, şəxsi pul balansının mənfi olduğunu bildirib.

Ekspertlər MrBeast-in sərvətini təxminən 2,6 milyard dollar qiymətləndirirlər. O, həmçinin Amazon ilə 100 milyon dollarlıq müqaviləyə və təxminən 5 milyard dollar dəyərində qiymətləndirilən Beast Industries şirkətində nəzarət payına sahibdir.

Bununla belə, Donaldson bildirib ki, sərvətinin böyük hissəsi şirkətlərinin dəyəri ilə bağlıdır və əldə etdiyi gəlirləri demək olar ki, tam şəkildə yeni layihələrə və videoların istehsalına yatırır.

MrBeast hazırda yalnız YouTube-un deyil, ümumilikdə rəqəmsal media sənayesinin ən nüfuzlu və gəlirli simalarından biri hesab olunur.