Lüks dövrü BAŞA ÇATDI-Tanınmış dizayner VƏFAT ETDİ

Tiffany & Co. zərgərlik evinin uzun illər dizayn direktoru olmuş Con Lorinq 86 yaşında vəfat edib. O, ABŞ-ın Florida ştatının Palm Biç şəhərində dünyasını dəyişib.

Ajans.az xarici mediaya istinadən xəbər verir ki, Lorinq 1979–2009-cu illərdə şirkətin dizayn direktoru vəzifəsində çalışaraq Tiffany & Co.-nun müasir estetik görünüşünün formalaşmasında mühüm rol oynayıb. Təqaüdə çıxdıqdan sonra ona fəxri dizayn direktoru adı verilib.

Zərgərlik dizaynı ilə yanaşı, Lorinq şirkətin tarixi haqqında bir sıra kitabların müəllifi olub. Onun əsərlərindən bəziləri Doubleday nəşriyyatında çap olunub və Jaklin Kennedi Onassis tərəfindən redaktə edilib.

Yel Universitetinin məzunu olan Lorinq həmçinin Parisdə École des Beaux-Arts-da təhsil alıb. Tiffany & Co.-ya qoşulmazdan əvvəl o, “Architectural Digest” jurnalının Nyu-York bürosuna rəhbərlik edib. Onun əsərləri Müasir İncəsənət Muzeyi (MoMA), Uitni Muzeyi və Metropoliten İncəsənət Muzeyində sərgilənib.

Lorinqin fəaliyyəti dövründə Tiffany & Co. kiçik butik şəbəkəsindən qlobal brendə çevrilib. O, dünyanın müxtəlif ölkələrindən məhsullar seçərək şirkətin kolleksiyasını genişləndirib.

Onun geniş sosial çevrəsinə Avropa krallıq ailələrinin nümayəndələri, incəsənət xadimləri və Hollivud ulduzları daxil olub. Hazırda onun şəxsi arxivi Kolumbiya Universitetində saxlanılır.