Banklarda ənənəvi HR modeli tarixə qovuşur?

Ajans.az xəbər verir ki, məsələ ilə bağlı Rufanə Qasımova bildirib ki, bank sektorunda “HR” və “İstedadların İdarə Edilməsi” anlayışları arasında əsas fərq yanaşma, əhatə dairəsi və hədəflərdə özünü göstərir. 

 Onun sözlərinə görə, ənənəvi HR daha çox reaktiv və prosesyönümlü olduğu halda, İstedadların İdarə Edilməsi biznesin gələcəyinə hesablanmış proaktiv modeldir: 

“Ənənəvi HR modelində əsas fokus proseslər və inzibati idarəetmədirsə, İstedadların İdarə edilməsində əməkdaşların potensialı, inkişafı və strateji rollara hazırlanması ön plana çıxır. Həmçinin ənənəvi HR şirkətdəki bütün işçilərə eyni idarəetmə alətləri ilə yanaşır, İstedadların İdarə Edilməsi isə yüksək potensiallı əməkdaşları və kritik mövqeləri hədəfləyir. Məsuliyyət baxımından fərqlər isə ənənəvi modeldə HR departamentinin üzərindədir, İstedadların İdarə Edilməsində isə bu, HR və xətt rəhbərlərinin ortaq məsuliyyətidir”. 

 Ekspert bildirib ki, bank sektorunda bu yanaşmanın güclənməsinin əsas səbəbi rəqabətin və dinamikanın artmasıdır: 

“Bank sektorunda rəqəmsallaşma və FinTech rəqabətinin olması, müştəri təcrübəsinin ön planda dayanması, rutin işlərin avtomatlaşdırılması İstedadların İdarə Edilməsi modelinin əhəmiyyətini artırır. Həmçinin sənədləşmə, kadr uçotu və digər rutin HR funksiyaları proqram təminatları tərəfindən avtomatlaşdırılır. Belə olan halda HR-ın fiziki enerjisi inzibati işlərdən azad olur və strateji insan kapitalına yönəlir”. 

 Mütəxəssis hesab edir ki, hazırda banklar üçün ən effektiv yanaşma hibrid modeldir: 

“Bu gün banklar üçün hibrid, lakin ağırlıq mərkəzi “Talent Management” olan model daha effektivdir. Bankçılıq ciddi şəkildə tənzimlənən sahə olduğu üçün ənənəvi HR-ın gətirdiyi qanunvericilik bazası, daxili nizam-intizam və kadr kargüzarlığı funksiyaları tamamilə ləğv edilə bilməz. Lakin rəqabətdə qalib gəlmək, innovativ məhsullar yaratmaq və gələcəyin rəhbər heyətini yetişdirmək üçün mütləq Talent Management alətlərindən istifadə edilməlidir. Yəni əgər bank böyümək və bazara liderlik etmək istəyirsə, İstedadların İdarə Edilməsi modelinin olması qaçılmazdır”. 

Ekspert gələcəkdə HR departamentlərinin transformasiyasının daha da sürətlənəcəyini düşünür: 

 “Tamamilə “udulmadan” söhbət getmir. Ancaq hesab edirəm ki, gələcəkdə HR adı altında fəaliyyət göstərən departamentlərin adı “People & Culture” (İnsanlar və Mədəniyyət) və ya “Talent Architecture” (İstedad Arxitekturası) kimi dəyişəcək. Çünki süni intellekt və avtomatlaşdırma HR-ın bütün mexaniki və inzibati yükünü üzərinə götürəcək. İnsan Resursları mütəxəssisləri isə yalnız strateji məsələlər, korporativ mədəniyyətin qurulması, işçi məmnuniyyəti, liderlərin yetişdirilməsi və istedadların inkişafı ilə məşğul olacaqlar”. 

Mələksəda Ziyad