Britaniya kral ailəsində nə baş verir?

Böyük Britaniya kralı III Çarlzın kiçik oğlu Şahzadə Harrinin telefon zənglərinə cavab verməyi dayandırmasının səbəbi ilə bağlı yeni iddialar səsləndirilib.

Ajans.az xəbər verir ki, bu barədə kral ailəsi üzrə ekspert Kinsey Skofild TalkTV telekanalında bioqraf Robert Jobsona istinadən danışıb.

Skofildin sözlərinə görə, III Çarlz hələ Uels şahzadəsi olduğu dövrdə Harrinin davamlı maliyyə dəstəyi ilə bağlı müraciətlərindən bezdiyi üçün onun zənglərinə cavab verməyi dayandırıb.

"Çarlz etiraf edib ki, Harrinin davamlı pul istəmələri ona özünü ata yox, bankomat kimi hiss etdirirdi", – ekspert bildirib.

Skofild həmçinin iddia edib ki, mərhum Kraliça II Yelizaveta da Şahzadə Harri və onun həyat yoldaşı Meqan Marklla ünsiyyətdə ehtiyatlı davranırdı. Onun sözlərinə görə, kraliça şəxsi söhbətlərin mediaya sızacağından narahat olduğu üçün görüşlər zamanı köməkçilərinin və ya yaxın əməkdaşlarının yanında olmasını istəyirdi.

Ekspert əlavə edib ki, hazırkı kraliça Kamillanın da bu məsələdə sərt mövqe tutduğu və III Çarlzın Harri ilə şahidsiz görüşməsini məqsədəuyğun hesab etmədiyi iddia olunur.

Bu açıqlamalar Şahzadə Harri və Meqan Marklın Böyük Britaniyaya planlaşdırılan səfəri ərəfəsində səsləndirilib. Bildirilir ki, Meqan Marklın 2027-ci ildə keçiriləcək Invictus Games yarışlarının təşviqi çərçivəsində ərinə qoşulması gözlənilir.

Məlumata görə, Harri əvvəlcə oğlu Arçi və qızı Lilibet də daxil olmaqla bütün ailəsi ilə Britaniyaya səfər etməyi planlaşdırırdı. Lakin Böyük Britaniya hökumətinin dövlət hesabına təhlükəsizlik təmin olunması ilə bağlı müraciətini rədd etməsindən sonra bu plan yenidən nəzərdən keçirilir.

Qeyd edək ki, məqalədə yer alan məlumatlar kral ailəsi üzrə ekspertlərin və bioqrafların iddialarına əsaslanır. Bu iddialarla bağlı Bukinqem Sarayı və ya kral ailəsi tərəfindən rəsmi açıqlama verilməyib.